ថ្ងៃចន្ទ ១៤រោច ខែមិគសិរ ឆ្នាំជូត ទោស័ក ព.ស.២៥៦៤ ត្រូវនឹងថ្ងៃទី១៤ ខែធ្នូ ឆ្នាំ២០២០ នៅមន្ទីរកសិកម្ម រុក្ខាប្រមាញ់ និងនេសាទខេត្តស្វាយរៀង បានរៀបចំកិច្ចប្រជុំលទ្ធផលការងារប្រចាំខែធ្នូ និងទិសដៅអនុវត្តន៍បន្ត ដឹកនាំអង្គប្រជុំដោយ លោក សុខ សុទ្ធាវុធ ប្រធានមន្ទីរកសិកម្ម រុក្ខាប្រមាញ់ និងនេសាទខេត្តស្វាយរៀង។ អង្គប្រជុំបានដំណើការតាមកម្មវិធីដូចខាងក្រោម៖

១. ពិនិត្យ ផ្ទៀងផ្ទាត់របាយការណ៍ប្រចាំឆ្នាំ២០២០ និងទិសដៅអនុវត្តបន្ត

២. ផ្សព្វផ្សាយលិខិតណែនាំរបស់ក្រសួង និងរដ្ឋបាលខេត្ត រួមមាន៖ 

- លិខិតលេខ ១០៤៦៩ កសក ចុះថ្ងៃទី២៧ ខែវិច្ឆិកា ឆ្នាំ២០២០ របស់ក្រសួងកសិកម្ម រុក្ខាប្រមាញ់ និងនេសាទ ស្តីពីករណីលើកទឹកចិត្តក្នុងការតែងតាំងនាយខណ្ឌរដ្ឋបាលព្រៃឈើ និងនាយខណ្ឌរដ្ឋបាលជលផល ជាអនុប្រធានមន្ទីរកសិកម្ម រុក្ខាប្រមាញ់ និងនេសាទ។

- លិខិតលេខ ១០៤០៩ កសក.ប ចុះថ្ងៃទី២៦​ ខែវិច្ឆិកា ឆ្នាំ២០២០ របស់ក្រសួងកសិកម្ម រុក្ខាប្រមាញ់ និងនេសាទ ស្តីពី ករណីរបាយការណ៍បូកសរុបលទ្ធផលជួបពិភាក្សាការងារជាមួយថ្នាក់ដឹកនាំមន្ទីរ និងជួបពិភាក្សាការងារជាមួយថ្នាក់ដឹកនាំរដ្ឋបាលខេត្ត។

- លិខិតលេខ ៥៦១/២០ល.ស ចុះថ្ងៃទី០៣ ខែធ្នូ ឆ្នាំ២០២០ របស់រដ្ឋបាលខេត្តស្វាយរៀង ស្តីពី ការរៀបចំកែលម្អ លោភ័ណភាពនៅតាមមន្ទីរ អង្គភាព និងទីសាធារណៈក្នុងក្រុងស្វាយរៀង។

- លិខិតលេខ ១០៧៩៩ កសក ចុះថ្ងៃទី០៨ ខែធ្នូ ឆ្នាំ២០២០ របស់ក្រសួងកសិកម្ម រុក្ខាប្រមាញ់ និងនេសាទ ស្តីពីវិធានការបង្ការ និងទប់ស្កាត់ការរីករាលដាលនៃជំងឺ-១៩ ក្នុងព្រឹត្តិការណ៍ “សហគមន៍ ២៨ វិច្ឆិកា”។

- លិខិតលេខ ១០២៥១ កសក ចុះថ្ងៃទី២៣ ខែវិច្ឆិកា ឆ្នាំ២០២០ របស់ក្រសួងកសិកម្ម រុក្ខាប្រមាញ់ និងនេសាទ ស្តីពីករណីរបាយការណ៍បូកសរុបលទ្ធផលជួបពិភាក្សាការងារជាមួយថ្នាក់ដឹកនាំមន្ទីរ និងជួបពិភាក្សាការងារជាមួយថ្នាក់ដឹកនាំរដ្ឋបាលខេត្ត។

៣. ការរៀបចំរចនាសម្ព័ន្ធ និងតារាងបែងចែកតួនាទីភារកិច្ច

៤. ពិភាក្សាលើការរៀបចំផែនការប្រចាំឆ្នាំឆមាស ត្រីមាស ប្រចាំខែ និងប្រចាំសប្តាហ៍

៥. បញ្ហាផ្សេងៗ

តាមរយៈកិច្ចប្រជុំខាងលើលោកប្រធានមន្ទីរបានធ្វើការណែនាំ និងពិភាក្សាបញ្ហាចាំបាច់មួយចំនួនដូចខាងក្រោម៖

• ណែនាំមន្ត្រីរាជការទាំងអស់ ឱ្យបន្តយកចិត្តទុកដាក់អនុវត្តវិធានការសុខាភិបាល ដើម្បីចូលរួមទប់ស្កាត់ ការឆ្លងរីករាលដាលនៃជំងឺកូវីដ-១៩
• មន្ត្រីទទួលបន្ទុកការងារបណ្តាញសង្គម ហ្វេសបុក គេហទំព័រ ត្រូវបន្តតាមដានរាល់ការបង្ហោះ ការផ្សព្វផ្សាយ និងមតិរិះគន់របស់មហាជន ពាក់ព័ន្ធនឹងការងារកសិកម្ម
• រាល់ពេលចុះបំពេញការងារនៅតាមមូលដ្ឋានត្រូវធ្វើរបាយការណ៍ឱ្យបានត្រឹមត្រូវ ជាក់លាក់ ដោយភ្ជាប់ជាមួយរូបថតស្របតាមលក្ខណៈបច្ចេកទេស
• មន្ទីរគ្រោងប្រលែងកូនត្រីនៅក្នុងរង្វង់មូលស្រះវង់នៅថ្ងៃទី០១ ខែមករា ឆ្នាំ២០២០ ចំនួន១០០០ក្បាល
• រាជរដ្ឋាភិបាលកម្ពុជា គ្រោងរៀបចំកិច្ចប្រជុំពិសេសមួយ រវាងមន្ត្រីពាក់ព័ន្ធនៃប្រទេសវៀតណាម និងកម្ពុជា ក្រោមអធិបតីភាព របស់ប្រមុខរាជរដ្ឋាភិបាលកម្ពុជានៅសាលាខេត្តស្វាយរៀង
• លោកប្រធានមន្ទីរក៍បានណែនាំឱ្យការិយាល័យពាក់ព័ន្ធធ្វើការសម្អាត និងកែលម្អសោភ័ណភាពខាងមុខអង្គភាពនីមួយៗ និងត្រៀមទីតាំងមួយចំនួនសម្រាប់ជូនប្រតិភូរបស់ក្រសួងចុះបំពេញការងារ