នាព្រឹកថ្ងៃចន្ទ០៦រោច ខែកត្ដិក ឆ្នាំខាល ចត្វាស័ក ព.ស.២៥៦៦ ត្រូវនឹងថ្ងៃទី១៤ ខែវិច្ឆិកា ឆ្នាំ២០២២
លោកសុខ សុទ្ធាវុធ ប្រធានមន្ទីរកសិកម្មរុក្ខាប្រមាញ់ និងនេសាទខេត្តស្វាយរៀង បានអញ្ជើញចូលរួមក្នុងកិច្ចប្រជុំសន្ទនាស្ដីពី «ការប្រើប្រាស់ថាមពលអគ្គិសនីសម្រាប់វិស័យកសិកម្ម» ដើម្បីផ្សព្វផ្សាយដល់បងប្អូនប្រជាកសិករអំពីគោលនយោបាយអនុគ្រោះថ្លៃអគ្គិសនីនៅក្នុងវិស័យកសិកម្ម ដែលរដ្ឋាភិបាលកម្ពុជាបានដាក់ឱ្យអនុវត្តចាប់តាំងពីឆ្នាំ២០២១មកម្ល៉េះ។ ក្រោមអធិបតីភាពដ៍ខ្ពង់ខ្ពស់ឯកឧត្តម ឌិត ទីណា រដ្ឋមន្ដ្រីក្រសួងកសិកម្ម រុក្ខាប្រមាញ់ និងនេសាទ បានថ្លែងថា កសិករ ម្ចាស់កសិដ្ឋាន និងអ្នកផលិតនៅក្នុងវិស័យកសិកម្មភាគច្រើនលើសលប់ដែលឯកឧត្តមបានជួបនៅក្នុងដំណើរចុះបេសកកម្ម និងក្នុងជំនួបជាច្រើន ពុំបានដឹងអំពីគោលនយោបាយអនុគ្រោះថ្លៃអគ្គិសនីនេះទេ ដែលជាហេតុធ្វើឱ្យពួកគាត់មិនអាចចំណេញច្រើន។
តាមរយៈកិច្ចសន្ទនាដែលមានការចូលរួមពីឯកឧត្តម ស៊ុយ សែម រដ្ឋមន្ត្រីក្រសួងរ៉ែ និងថាមពល ឯកឧត្តម យឹម វិសិដ្ឋ ប្រធានអាជ្ញាធរអគ្គិសនីកម្ពុជា និងឯកឧត្តម កែវ រតនៈ រដ្ឋមន្រ្តីប្រតិភូអមនាយករដ្ឋមន្រ្តី និងជាអគ្គនាយកអគ្គិសនីកម្ពុជា។ ឯកឧត្តម ឌិត ទីណា សង្ឃឹមយ៉ាងមុតមាំថា អ្នកប្រកបរបរនៅក្នុងវិស័យកសិកម្មដែលចូលរួមនៅក្នុងកិច្ចសន្ទនានេះនឹងបានយល់ដឹងកាន់តែច្បាស់អំពីគោលនយោបាយអនុគ្រោះថ្លៃអគ្គសិនីសម្រាប់វិស័យកសិកម្ម ហើយឈានដល់ការអនុវត្តឲ្យបានពេញលេញនូវការអនុគ្រោះថ្លៃអគ្គិសនីនេះ។ ការអនុគ្រោះថ្លៃអគ្គិសនីនេះបានពេញលេញ និងអាចកាត់បន្ថយការចំណាយ ហើយជួយឱ្យកសិករទទួលបានផលចំណេញច្រើនជាងមុន។
ថ្លែងទៅកាន់អ្នកចូលរួមដែលជាកសិករមកពីបណ្ដាខេត្តនានាទូទាំងប្រទេសកម្ពុជា ឯកឧត្តម ស៊ុយ សែម រដ្ឋមន្ដ្រីក្រសួងរ៉ែ និងថាមពល បានចាត់ទុកអ្នកប្រកបរបរកសិកម្មថាជា «អ្នកក្លាហាន» សម្រាប់ ឯកឧត្តម ស៊ុយ សែម វិស័យកសិកម្ម ជាវិស័យមួយដែលមានបញ្ហាប្រឈមច្រើន និងត្រូវចាយទុនខ្ពស់។ ហេតុនេះហើយទើបរដ្ឋាភិបាលកម្ពុជាយកចិត្តទុកដាក់ និងចាត់ទុកវិស័យកសិកម្មជាវិស័យស្នូល។
បើតាម ឯកឧត្តម ស៊ុយ សែម ចាប់តាំងពីឆ្នាំ២០២១មក រាជរដ្ឋាភិបាលបានដាក់ចេញនូវគោលនយោបាយអនុគ្រោះថ្លៃអគ្គិសនីសម្រាប់វិស័យកសិកម្ម ដែលមានតម្លៃទាបជាងការប្រើប្រាស់អគ្គិសនីប្រភេទផ្សេងៗ។ ចំពោះការប្រើប្រាស់នៅក្នុងវិស័យកសិកម្ម ទាំងនៅពេលថ្ងៃ និងនៅពេលយប់ ជាពិសេសគឺនៅពេលយប់ ចាប់ពីម៉ោង៩យប់ ដល់ម៉ោង៧ព្រឹក ថ្លៃអគ្គិសនីត្រូវបានអនុគ្រោះឲ្យបង់ត្រឹមតែ ៤៨០រៀលក្នុង១គីឡូវ៉ាត់ម៉ោងប៉ុណ្ណោះ។
តម្លៃអគ្គិសនីអនុគ្រោះ ៤៨០រៀលក្នុង១គីឡូវ៉ាត់ម៉ោង សម្រាប់វិស័យកសិកម្ម ចាប់ពីម៉ោង៩យប់ ដល់៧ព្រឹក ត្រូវបាន ឯកឧត្តម កែវ រតនៈ រដ្ឋមន្ត្រីប្រតិភូអមនាយករដ្ឋមន្ត្រី និងជាអគ្គនាយកអគ្គិសនីកម្ពុជា សង្កត់ធ្ងន់ថា ជាតម្លៃដែលរាជរដ្ឋាភិបាលឧបត្ថម្ភធន មានន័យថា រាជរដ្ឋាភិបាលលក់ភ្លើងក្នុងតម្លៃខាត ដែលថ្លៃដើមអគ្គិសនីក្នុងពេលបច្ចុប្បន្នមានតម្លៃប្រមាណ១ពាន់រៀលក្នុង១គីឡូវ៉ាត់ម៉ោង។
លោក យឹម វិសិដ្ឋ ប្រធានអាជ្ញាធរអគ្គិសនីកម្ពុជា បានជំរុញលើកទឹកចិត្តឱ្យបងប្អូនកសិករ អ្នកផលិត អ្នកចិញ្ចឹមសត្វ អនុវត្តគោលនយោបាយអនុគ្រោះអគ្គិសនីសម្រាប់វិស័យកសិកម្ម ឲ្យបានកាន់តែច្រើនតាមដែលអាចធ្វើទៅបាន ដើម្បីកាត់បន្ថយការចំណាយថ្លៃដើម និងបង្កើនផលចំណេញ។
ជាមួយគ្នានេះ អគ្គនាយកអគ្គិសនីកម្ពុជា និងប្រធានអាជ្ញាធរអគ្គិសនីកម្ពុជា បានប្រកាសការរង់ចាំសហការជាមួយបងប្អូនក្នុងវិស័យកសិកម្ម ក្នុងការដោះស្រាយបញ្ហានានា ពាក់ព័ន្ធនឹងការភ្ជាប់បណ្តាញអគ្គិសិនី ដែលមានការអនុគ្រោះថ្លៃ។
ចំពោះព័ត៌មានបន្ថែម បងប្អូនកសិករ អ្នកផលិត អ្នកចិញ្ចឹមសត្វ និងអ្នកដែលធ្វើការក្នុងវិស័យកសិកម្មទាំងអស់ អាចទាក់ទងសួរព័ត៌មានបន្ថែមតាមរយៈ លេខទូរសព្ទ ០៧៧ ២២២ ០១២ និង ០៩០ ៩០៣ ៣១១ ឬអាចទាក់ទងតាមរយៈ Facebook របស់អគ្គិសនីកម្ពុជា៕
អគ្គនាយកអគ្គិសនីកម្ពុជា លោក កែវ រតនៈ បានឱ្យដឹងថា បច្ចុប្បន្នរដ្ឋាភិបាលមានបញ្ចេញប្រាក់ប្រមាណ ១២០ លានដុល្លារ ក្នុង ១ ឆ្នាំ ឧបត្ថម្ភធនដល់វិស័យអគ្គិសនីដើម្បីធ្វើឱ្យមានតម្លៃទាប និងធានាការផ្គត់ផ្គង់ក្នុងប្រទេសបានពេញលេញ។ ការធ្វើឱ្យតម្លៃអគ្គិសនីទាប នឹងរួមចំណែកធ្វើឱ្យកម្រិតជីវភាពប្រជាជនកាន់តែប្រសើរ។ លោកបន្តថា ក្នុងនាមប្រតិបត្តិករចែកចាយថាមពលអគ្គិសនីលោកពិតជាលើកទឹកចិត្តឱ្យប្រជាកសិករមកដាក់ពាក្យស្នើសុំតភ្ជាប់ថាមពលអគ្គិសនីតម្លៃទាបឱ្យកាន់តែច្រើន។
ទាក់ទងនីតិវិធីដើម្បីទទួលបានអគ្គិសនីតម្លៃទាបក្នុងវិស័យកសិកម្ម លោក កែវ រតនៈ បញ្ជាក់ថា៖ «អ្នកប្រើប្រាស់ក្នុងវិស័យកសិកម្ម រួមទាំងអ្នកកែច្នៃទាំងអស់អាចទៅដាក់ពាក្យនៅកន្លែងចែកចាយ (សេវាករ) ដោយយើងធានានឹងធ្វើឱ្យអ្វីៗដំណើរការទៅមុខដោយរលូន។ ចំពោះអ្នកស្នើសុំប្រើប្រាស់ក្នុងនាមជាសមាគម ឬសហគមន៍ គឺទាមទារ ឱ្យមានការធានា ឬដឹងឮពីអាជ្ញាធរចំពោះការឈរឈ្មោះទទួលខុសត្រូវ»៕នៅទីស្ដីការក្រសួងកសិកម្ម រុក្ខាប្រមាញ់ និងនេសាទ។
